ჟან კალვინი (ფრანგ. Jean Cauvin — ჟან კოვენი, ლათინიზირიბული ვარიანტია — Calvinus; ინგ. John Calvin); (*1509 ნუვაიონი, საფრანგეთი—1564, ჟენევა, შვეიცარია) — ფრანგი თეოლოგი, რეფორმატორი, კალვინიზმის დამფუძნებელი. ბიოგრაფია ჟან კოვენი დაიბადა 1509 წლის 10 ივლისს ქალაქ ნუაიონში, საფრანგეთი. 14 წლის ასაკში მამამისმა, ადვოკატმა ჟერარ კოვენმა, გაგზავნა პარიზის უნივერსიტეტში ჰუმანიტარულ მეცნიერებათა და სამართლის სასწავლად. 1532 წელს ორლეანში დაიცვა სადოქტორო ხარისხი. 1536 წელს გაემგზავრა შვეიცარიის ქალაქ ბაზელში, თუმცა გზად შეჩერდა და, საბოლოოდ, დასახლდა ჟენევაში. იმავე წელს ქალაქიდან გაქცევა მოუწია, ვინაიდან ძალაუფლება მისმა მოწინააღმდეგეებმა ჩაიგდეს ხელთ. 1538 – 1541 წლებში სტრასბურში მღვდლად მსახურობდა. 1541 ჟენევის მაგისტრატმა სთხოვა ქალაქში დაბრუნება. კალვინი დაბრუნდა ჟენევაში, სადაც სიკვდილამდე იცხოვრა. კალვინის რეფორმატორულმა იდეებმა არამარტო შვეიცარიაში ჰპოვა გავრცელება, არამედ მრავალ სხვა ქვეყანაში. მიუხედავდ იმისა, რომ კალვინს არ ჰქონდა საერო ძალაუფლება, ნელ–ნელა ქალაქში დამყარდა რეჟიმი, რომელიც თეოკრატიულ დიქტატურას წააგავდა. კალვინს "ჟენევის პაპსაც" კი უწოდებდნენ. მიუხედავად ამისა, კალვინისტური ეკლესიის ორგანიზაცია შედერებით დემოკრატიული ხასიათი შეინარჩუნა. კალვინი გარდაიცვალა 1564 წლის 27 მაისს ქალაქ ჟენევაში.
